ദേശീയതലത്തിൽ വിസ്മയമായി ‘പച്ചത്തെെയ്യം’; ഫിലിം ക്രിട്ടിക്സ് പുരസ്കാര തിളക്കത്തിൽ കാസർകോടൻ സിനിമ

കാസർകോട്: കലയും സംസ്കാരവും ആധുനിക ജീവിതസാഹചര്യങ്ങളും തമ്മിലുള്ള സംഘർഷത്തെ വെള്ളിത്തിരയിൽ മനോഹരമായി ആവിഷ്കരിച്ച ‘പച്ചത്തെെയ്യം’ എന്ന ചലച്ചിത്രം പുരസ്കാരങ്ങളുടെ നെറുകയിൽ. 45-ാമത് ഫിലിം ക്രിട്ടിക്സ് അവാർഡിൽ മികച്ച കുട്ടികളുടെ സിനിമയായി തിരഞ്ഞെടുക്കപ്പെട്ടതോടെ കാസർകോട് ജില്ലയുടെ പെരുമ അന്താരാഷ്ട്ര തലത്തിൽ ഒരിക്കൽ കൂടി ശ്രദ്ധിക്കപ്പെടുകയാണ്. കാസർകോട് ജില്ലാ പഞ്ചായത്ത് 2023-24 വാർഷിക പദ്ധതിയുടെ ഭാഗമായി നിർമ്മിച്ച ഈ ചിത്രം, ഒരു തദ്ദേശ സ്വയംഭരണ സ്ഥാപനം നിർമ്മിക്കുന്ന സിനിമ എന്ന നിലയിൽ വലിയ ചരിത്രപരമായ പ്രാധാന്യമാണ് അർഹിക്കുന്നത്. ചിത്രത്തിലെ കേന്ദ്രകഥാപാത്രത്തെ അവതരിപ്പിച്ച കാഞ്ഞങ്ങാട് ജി.എച്ച്.എസ്.എസിലെ പത്താം ക്ലാസ് വിദ്യാർത്ഥി ധാർമിക് സുധാകരൻ മികച്ച ബാലനടനുള്ള അവാർഡും കരസ്ഥമാക്കിയതോടെ ഈ നേട്ടം ഇരട്ടിമധുരമായി.

ഡിജിറ്റൽ യുഗത്തിൽ വളരുന്ന തലമുറ അഭിമുഖീകരിക്കുന്ന ഏറ്റവും വലിയ വെല്ലുവിളിയായ ‘സ്ക്രീൻ അഡിക്ഷൻ’ അഥവാ മൊബൈൽ ഫോണിനോടുള്ള അമിതമായ ആസക്തിയാണ് ‘പച്ചത്തെെയ്യം’ എന്ന സിനിമയുടെ മുഖ്യ പ്രമേയം. സ്മാർട്ട്ഫോണുകളുടെയും ഓൺലൈൻ ഗെയിമുകളുടെയും മായാലോകത്ത് കുടുങ്ങിപ്പോകുന്ന കുട്ടികൾക്ക് തങ്ങളുടെ വേരുകളും മണ്ണും നഷ്ടപ്പെടുന്നതെങ്ങനെയെന്ന് ചിത്രം ചർച്ച ചെയ്യുന്നു. എന്നാൽ വെറുമൊരു ഉപദേശ സിനിമയാകാതെ, കലയിലൂടെയും കളികളിലൂടെയും കുട്ടികളെ സ്വാഭാവിക ജീവിതത്തിലേക്ക് എങ്ങനെ തിരികെ കൊണ്ടുവരാം എന്ന പോസിറ്റീവ് ചിന്തയാണ് ‘പച്ചത്തെെയ്യം’ പങ്കുവെക്കുന്നത്. ഉത്തരമലബാറിന്റെ വിശ്വപ്രസിദ്ധമായ തെയ്യം എന്ന കലാരൂപത്തെ ഒരു മാധ്യമമായി ഉപയോഗിച്ചുകൊണ്ടാണ് ഇതിന്റെ ആവിഷ്കാരം നടത്തിയിരിക്കുന്നത്.

ജില്ലയുടെ വിവിധ ഭാഗങ്ങളിൽ നിന്നായി കഠിനമായ സ്ക്രീനിംഗിലൂടെ തിരഞ്ഞെടുത്ത 19 കുട്ടികളാണ് ‘പച്ചത്തെെയ്യം’ എന്ന സിനിമയിൽ വേഷമിട്ടത്. അഭിനയപരിചയമില്ലാത്ത ഈ കുട്ടികളെ മികച്ച പരിശീലനത്തിലൂടെ ക്യാമറയ്ക്ക് മുന്നിലെത്തിക്കാൻ ചിത്രത്തിന്റെ അണിയറപ്രവർത്തകർക്ക് സാധിച്ചു. കാസർകോടിന്റെ ഗ്രാമീണ ഭംഗിയും നദികളും വയലുകളും പശ്ചാത്തലമാക്കിയാണ് ചിത്രം ഷൂട്ട് ചെയ്തത്. ഇടുങ്ങിയ സ്ക്രീനിൽ നിന്ന് പ്രകൃതിയുടെ വിശാലമായ ക്യാൻവാസിലേക്ക് കുട്ടികളെ നയിക്കുന്ന പശ്ചാത്തലമാണ് ഇതിനുള്ളത്. ജില്ലാ പഞ്ചായത്തിന്റെ നേതൃത്വത്തിൽ ഇത്തരമൊരു സംരംഭം ഏറ്റെടുക്കാൻ കാണിച്ച ധൈര്യം ഇന്ന് രാജ്യമെമ്പാടുമുള്ള ചലച്ചിത്ര പ്രേമികൾക്കിടയിൽ ചർച്ചയായിക്കഴിഞ്ഞു.
കേരളത്തിന് പുറത്തും ‘പച്ചത്തെെയ്യം’ വലിയ തരംഗമാണ് സൃഷ്ടിച്ചത്. തമിഴ്‌നാട്ടിലെ രാമേശ്വരം അന്താരാഷ്ട്ര ഫിലിം ഫെസ്റ്റിവലിലും ബീഹാറിലെ ജാദ ഇന്റർനാഷണൽ ഫെസ്റ്റിവലിലും മികച്ച സിനിമയ്ക്കുള്ള പുരസ്കാരങ്ങൾ ഈ ചിത്രം നേരത്തെ വാരിക്കൂട്ടിയിരുന്നു. ഇതിന് പുറമെ അഹമ്മദാബാദ്, ഗുവാഹത്തി, ഡൽഹി തുടങ്ങിയ ഇടങ്ങളിൽ നടന്ന പ്രമുഖ ചലച്ചിത്ര മേളകളിലും ‘പച്ചത്തെെയ്യം’ ഔദ്യോഗികമായി പ്രദർശിപ്പിച്ചു.

തെയ്യത്തിന്റെ ഐതിഹ്യത്തെയും വിശ്വസത്തെയും മുറിവേൽപ്പിക്കാതെ തന്നെ, അതിനെ ഒരു ജീവന്മരണ പോരാട്ടത്തിന്റെ കരുത്തായി സിനിമയിൽ ഉപയോഗിച്ചിരിക്കുന്നു. സ്ക്രീനിൽ കാണുന്ന ഡിജിറ്റൽ നിറങ്ങളേക്കാൾ പ്രകാശമുള്ളതാണ് നമ്മുടെ പ്രകൃതിയുടെ പച്ചപ്പും തെയ്യത്തിന്റെ വർണ്ണങ്ങളുമെന്ന് സിനിമ ഓർമ്മിപ്പിക്കുന്നു.
അനന്തപദ്മനാഭന്റെ ഹൃദ്യമായ തിരക്കഥയും ബിജു മുത്തലയുടെ സംവിധാന മികവും സിനിമയെ മികച്ച നിലവാരത്തിലേക്ക് ഉയർത്തി. മികച്ച ബാലനടനായി തിരഞ്ഞെടുക്കപ്പെട്ട ധാർമിക് സുധാകരൻ ചിത്രത്തിലെ വൈകാരികമായ രംഗങ്ങളിൽ പ്രകടിപ്പിച്ച പക്വത ഏറെ പ്രശംസ പിടിച്ചുപറ്റിയിരുന്നു. തെയ്യം കെട്ടിയാടുന്ന പിതാവിന്റെയും ആധുനികമായ അഭിരുചികളുള്ള മകന്റെയും ഇടയിലുള്ള ബന്ധവും സിനിമയിൽ ആഴത്തിൽ പ്രതിപാദിക്കുന്നുണ്ട്. കാസർകോട് ജില്ലയിലെ ഉൾനാടൻ ഗ്രാമങ്ങളായ പടന്നക്കാട്, തൈക്കടപ്പുറം തുടങ്ങിയ പ്രദേശങ്ങളുടെ ദൃശ്യഭംഗി ചിത്രത്തിന് ഒരു റിയലിസ്റ്റിക് സ്പർശം നൽകുന്നു.

ഒരു സിനിമ എന്നതിലുപരി, സാമൂഹികമായ ഒരു മാറ്റത്തിനുള്ള ഉപകരണമായാണ് ‘പച്ചത്തെെയ്യം’ ഉപയോഗിക്കപ്പെടുന്നത്. ജില്ലയിലെ എല്ലാ സ്കൂളുകളിലും ഈ ചിത്രം പ്രദർശിപ്പിക്കാനുള്ള നടപടികൾ ജില്ലാ ഭരണകൂടം സ്വീകരിച്ചു വരികയാണ്. കലയും വിദ്യാഭ്യാസവും കൈകോർത്താൽ പുതിയൊരു മാറ്റം സാധ്യമാണെന്ന് ഈ ചിത്രം തെളിയിക്കുന്നു. പുരസ്കാരങ്ങളുടെ തിളക്കം സിനിമയ്ക്ക് വലിയൊരു വിപണി ഒരുക്കുമെന്നും കൂടുതൽ കുട്ടികൾക്ക് ഈ സന്ദേശം കൈമാറാൻ സാധിക്കുമെന്നുമാണ് ജില്ലാ പഞ്ചായത്ത് അധികൃതർ പ്രതീക്ഷിക്കുന്നത്. കാസർകോടിന്റെ മണ്ണിൽ നിന്ന് ഉയർന്നു വന്ന ഈ ‘പച്ചത്തെെയ്യം’ വരും കാലങ്ങളിൽ മലയാളത്തിലെ മികച്ച കുട്ടികളുടെ സിനിമകളുടെ പട്ടികയിൽ മുൻനിരയിൽ തന്നെ ഇടംപിടിക്കുമെന്ന് ഉറപ്പാണ്.