ശ്രേയസ് അയ്യർ തന്റെ കരിയറിൽ വരുത്തിയ വലിയ മാറ്റത്തിന് പിന്നിലെ യഥാർത്ഥ കാരണം വെളിപ്പെടുത്തി. തളർത്താൻ ശ്രമിച്ചവരുടെ പരിഹാസങ്ങളാണ് തന്നെ ഈ നിലയിലെത്തിച്ചതെന്ന് ഐപിഎല്ലിൽ പഞ്ചാബ് നായകനായ അദ്ദേഹം പറഞ്ഞു.
വർഷങ്ങളായി ശ്രേയസ് അയ്യർ നേരിടുന്ന പ്രധാന വിമർശനമായിരുന്നു ബൗൺസറുകൾ അഥവാ ഷോർട്ട് പിച്ച് പന്തുകൾ നേരിടാനുള്ള ബലഹീനത. “ചില പന്തുകളിൽ എനിക്കൊന്നും ചെയ്യാൻ കഴിയില്ലെന്ന് ചിലർ പറയുന്നത് ഞാൻ കേട്ടിരുന്നു. ഷോർട്ട് പിച്ച് പന്തുകൾ നേരിടുമ്പോഴുള്ള പ്രശ്നം എനിക്ക് ഒരിക്കലും പരിഹരിക്കാനാവില്ലെന്ന പരിഹാസം പക്ഷെ എന്നെ വല്ലാതെ ചൊടിപ്പിച്ചു” – ജിയോ ഹോട്ട്സ്റ്റാറിന് നൽകിയ അഭിമുഖത്തിൽ അദ്ദേഹം വ്യക്തമാക്കി. അസാധ്യമെന്ന് കേൾക്കുന്നത് ഇഷ്ടമല്ലാത്തതിനാലാണ് അത് തിരുത്തിക്കുറിക്കുമെന്ന് ഉറപ്പിച്ചത്.
മുൻപ് ഷോർട്ട് ബോളുകളിൽ പ്രതിരോധിക്കാനോ സിംഗിളെടുക്കാനോ ആയിരുന്നു ശ്രേയസ് ശ്രമിച്ചിരുന്നത്. എന്നാൽ ഇപ്പോൾ തന്റെ സോണിൽ പന്ത് വന്നാൽ സിക്സറിന് പറത്തുന്ന രീതിയിലേക്ക് അദ്ദേഹം ശൈലി മാറ്റി. ലോകത്തെ മികച്ച പേസറായ ജസ്പ്രീത് ബുംറയെ പോലും സിക്സറിന് പറത്തി അദ്ദേഹം ഇതിന് മറുപടി നൽകി.
തന്നെ താഴെയിറക്കാൻ ശ്രമിച്ചവർക്കുള്ള കൃത്യമായ മറുപടിയായിരുന്നു ശ്രേയസ് അയ്യരുടെ ഈ തിരിച്ചുവരവ്. ഇതിനായി അദ്ദേഹം തന്റെ പരിശീലന രീതികളിലും മാറ്റം വരുത്തി. വിരാട് കോലി, രോഹിത് ശർമ്മ, എബി ഡി വില്ലിയേഴ്സ് എന്നിവരുടെ ബാറ്റിംഗ് ശൈലികൾ അദ്ദേഹം പഠിക്കുകയും അത് സ്വന്തം കളിയിൽ പ്രാവർത്തികമാക്കാൻ ശ്രമിക്കുകയും ചെയ്തു.
ഒരു പരിശീലന സെഷനിൽ ഏകദേശം 50 ഓവർ ബാറ്റ് ചെയ്യുകയും 300-ലധികം പന്തുകൾ നേരിടുകയും ചെയ്യാറുണ്ടെന്ന് ശ്രേയസ് പറഞ്ഞു. സൈഡ് ആം ത്രോകൾക്ക് പകരം യഥാർത്ഥ ബൗളർമാരെ നേരിട്ടാണ് അദ്ദേഹം താളം കണ്ടെത്തുന്നത്. പ്രവീൺ ആംറെ, അഭിഷേക് നായർ എന്നീ പരിശീലകരുടെ പിന്തുണയും തന്റെ വളർച്ചയിൽ വലുതാണെന്ന് അദ്ദേഹം വ്യക്തമാക്കി.
നടുവിനേറ്റ പരിക്കിന് ശേഷം പഴയതുപോലെ ബാറ്റ് ചെയ്യില്ലെന്ന് പറഞ്ഞവർക്കും അദ്ദേഹം മറുപടി നൽകി. പരിക്കിന് ശേഷം മാനസികമായി എങ്ങനെ തിരിച്ചുവരുന്നു എന്നതാണ് പ്രധാനമെന്നും, അനാവശ്യ വിമർശനങ്ങൾ അവഗണിക്കാൻ താൻ പഠിച്ചുവെന്നും അദ്ദേഹം വ്യക്തമാക്കി. തന്റെ ബാറ്റിംഗിലെ സ്ഥിരത നിലനിർത്താൻ കഠിനമായി പരിശ്രമിക്കുന്നുണ്ടെന്നും ശ്രേയസ് അയ്യർ കൂട്ടിച്ചേർത്തു. READ MORE https://periya.in/mala-parvathy-supports-kerala-hartal-nitin-raj-deat/
Leave a Reply