റോസ്മേരി കൊണ്ട് മുടി കൊഴിച്ചിൽ മാറ്റാം; മുടി വളരാൻ ഈ വിദ്യ പരീക്ഷിക്കൂ

നമ്മുടെ വീട്ടുമുറ്റത്തോ അല്ലെങ്കിൽ ചെറിയ ചട്ടികളിലോ വളരെ എളുപ്പത്തിൽ വളർത്താൻ കഴിയുന്ന ഒരു സുഗന്ധ ഔഷധസസ്യമാണ് റോസ്മേരി. വിദേശ രാജ്യങ്ങളിൽ പാചകത്തിന് രുചി കൂട്ടാൻ ഉപയോഗിക്കുന്ന ഈ സസ്യം ഇന്ന് കേരളത്തിലെ വീടുകളിലും സജീവമാണ്. പാചകത്തിന് അപ്പുറം മുടി സംരക്ഷണ കാര്യത്തിൽ റോസ്മേരി നൽകുന്ന ഫലങ്ങൾ അത്ഭുതകരമാണ്. വിലകൂടിയ ഹെയർ സീറങ്ങളിലോ കെമിക്കൽ അടങ്ങിയ എണ്ണകളിലോ അഭയം പ്രാപിക്കുന്നതിനേക്കാൾ എത്രയോ മടങ്ങ് ഗുണകരമാണ് പ്രകൃതിദത്തമായ ഈ ഔഷധം.

എന്തുകൊണ്ട് റോസ്മേരി?

മുടിയുടെ ആരോഗ്യത്തിന് ആവശ്യമായ ആന്റി ഓക്സിഡന്റുകളാൽ സമ്പന്നമാണ് റോസ് മേരി. തലയോട്ടിയിലെ രക്തചംക്രമണം വർദ്ധിപ്പിക്കാൻ ഇതിന് പ്രത്യേക കഴിവുണ്ട്. മുടിയുടെ വേരുകളിലേക്ക് രക്തപ്രവാഹം കൂടുമ്പോൾ സ്വാഭാവികമായും മുടിക്ക് കരുത്ത് ലഭിക്കുകയും കൊഴിച്ചിൽ നിലയ്ക്കുകയും ചെയ്യുന്നു. ആധുനിക പഠനങ്ങൾ സൂചിപ്പിക്കുന്നത് മുടി വളർച്ചയ്ക്ക് ഡോക്ടർമാർ നിർദ്ദേശിക്കുന്ന മിനോക്സിഡിൽ (Minoxidil) എന്ന മരുന്നിന് തുല്യമായ ഫലം നൽകാൻ പ്രകൃതിദത്തമായ റോസ്മേരി എണ്ണയ്ക്ക് സാധിക്കുമെന്നാണ്.

ഉപയോഗിക്കേണ്ട രീതികൾ

റോസ് മേരി പ്രധാനമായും രണ്ട് രീതിയിലാണ് മുടിയിൽ ഉപയോഗിക്കാൻ കഴിയുന്നത്. ഒന്ന് റോസ് മേരി വെള്ളമായും മറ്റൊന്ന് ഇതിൽ നിന്ന് വേർതിരിച്ചെടുക്കുന്ന എണ്ണയായും.

റോസ് മേരി വാട്ടർ: കുറച്ച് ഫ്രഷ് ആയ റോസ്മേരി ഇലകൾ വെള്ളത്തിലിട്ട് നന്നായി തിളപ്പിക്കുക. വെള്ളത്തിന്റെ നിറം മാറി ഒരു കടും ചുവപ്പോ തവിട്ടോ നിറമാകുമ്പോൾ അടുപ്പിൽ നിന്ന് മാറ്റി തണുപ്പിക്കാൻ വയ്ക്കുക. ഈ വെള്ളം ഒരു സ്പ്രേ ബോട്ടിലിലാക്കി ദിവസവും ഉറങ്ങുന്നതിന് മുൻപ് തലയോട്ടിയിൽ സ്പ്രേ ചെയ്യാം. ഇത് കഴുകിക്കളയേണ്ട ആവശ്യമില്ല.
റോസ് മേരി ഓയിൽ: തേങ്ങായെണ്ണയിലോ ബദാം എണ്ണയിലോ ഏതാനും തുള്ളി റോസ്മേരി എസൻഷ്യൽ ഓയിൽ ചേർത്ത് തലയിൽ തേച്ചു പിടിപ്പിക്കുന്നത് മുടിക്ക് തിളക്കം നൽകും. നേരിട്ട് എസൻഷ്യൽ ഓയിൽ തലയിൽ തേക്കാതിരിക്കാൻ ശ്രദ്ധിക്കണം.

താരൻ അകറ്റാൻ മികച്ച വഴി

തലയോട്ടിയിലുണ്ടാകുന്ന ചൊറിച്ചിലും താരനും പലപ്പോഴും മുടി കൊഴിച്ചിലിന് പ്രധാന കാരണമാകാറുണ്ട്. റോസ് മേരിയിലുള്ള ആന്റി ബാക്ടീരിയൽ, ആന്റി ഫംഗൽ ഗുണങ്ങൾ താരനെ ഫലപ്രദമായി പ്രതിരോധിക്കും. തലയോട്ടി വൃത്തിയായും അണുബാധകളില്ലാതെയും ഇരുന്നാൽ മാത്രമേ മുടി ആരോഗ്യത്തോടെ വളരുകയുള്ളൂ. താരൻ അകറ്റാൻ ഇതിന്റെ ഉപയോഗം പതിവാക്കുന്നത് ഏറെ ഗുണകരമാണ്.

മുടിക്ക് നല്ല കറുപ്പ് നിറവും തിളക്കവും

മുടി നരയ്ക്കുന്നത് തടയാനും മുടിക്ക് സ്വാഭാവികമായ കറുപ്പ് നിറം നൽകാനും റോസ് മേരി സഹായിക്കും. വേനൽക്കാലത്തെ കഠിനമായ വെയിൽ കാരണം മുടി ചെമ്പിക്കുന്നതും പൊട്ടിപ്പോകുന്നതും തടയാൻ ഇതിലെ പോഷകങ്ങൾ സഹായിക്കുന്നു. മുടിയുടെ ഈർപ്പം നിലനിർത്താനും മുടി കെട്ടുപിണയുന്നത് ഒഴിവാക്കാനും ഈ വിദ്യ പരീക്ഷിക്കാവുന്നതാണ്.

ശ്രദ്ധിക്കേണ്ട കാര്യങ്ങൾ

ഏതൊരു പ്രകൃതിദത്ത മാർഗ്ഗവും ഫലം നൽകാൻ അല്പം സമയമെടുക്കും. ചുരുങ്ങിയത് മൂന്ന് മുതൽ ആറ് മാസം വരെ തുടർച്ചയായി റോസ്മേരി ഉപയോഗിച്ചാൽ മാത്രമേ പ്രകടമായ മാറ്റം കാണാൻ സാധിക്കൂ. ഗർഭിണികൾക്കോ അല്ലെങ്കിൽ അലർജി പ്രശ്നമുള്ളവർക്കോ ഇത് ഉപയോഗിക്കുന്നതിന് മുൻപ് ഒരു വിദഗ്ദ്ധ ഉപദേശം തേടുന്നത് നന്നായിരിക്കും. മുടി കൊഴിച്ചിൽ മാറി പുതിയ മുടി മുളച്ചു വരാനും മുടിക്ക് നല്ല കട്ടി ലഭിക്കാനും ഈ ഔഷധസസ്യം നിങ്ങളെ സഹായിക്കും എന്നതിൽ സംശയമില്ല. READ MORE https://periya.in/rimi-tomy-shares-favorite-food-video-workout-fitness-viral/