ഇന്ധനവില വർദ്ധനവ് ഒരാഴ്ചയ്ക്കുള്ളിൽ; പെട്രോൾ, ഡീസൽ, പാചകവാതക നിരക്കുകൾ ഉയരാൻ സാധ്യത

രാജ്യത്ത് ഇന്ധനവില വർദ്ധിപ്പിക്കാനുള്ള നടപടികൾ സർക്കാർ പരിഗണിക്കുന്നതായി റിപ്പോർട്ട്. പടിഞ്ഞാറൻ ഏഷ്യയിലെ സംഘർഷങ്ങളെത്തുടർന്ന് ആഗോള ഊർജ്ജ വിപണിയിലുണ്ടായ അസ്ഥിരതയാണ് ഇന്ത്യയിലും പെട്രോൾ, ഡീസൽ, പാചകവാതക നിരക്കുകൾ ഉയരാൻ കാരണമാകുന്നത്.

പടിഞ്ഞാറൻ ഏഷ്യയിലെ യുദ്ധ സാഹചര്യങ്ങൾ ക്രൂഡ് ഓയിൽ വിതരണത്തെ ബാധിച്ചതോടെ ഇന്ത്യയിൽ ഇന്ധനവില വർദ്ധിക്കുമെന്ന് സൂചന. എണ്ണക്കമ്പനികൾ നേരിടുന്ന കനത്ത സാമ്പത്തിക നഷ്ടം കുറയ്ക്കുന്നതിനായി വരും ദിവസങ്ങളിൽ തന്നെ വില വർദ്ധനവ് ഉണ്ടായേക്കും. ഒരാഴ്ചയ്ക്കുള്ളിൽ ഇതുസംബന്ധിച്ച ഔദ്യോഗിക തീരുമാനം കേന്ദ്ര സർക്കാരിന്റെ ഭാഗത്തുനിന്നും ഉണ്ടായേക്കാമെന്നാണ് റിപ്പോർട്ടുകൾ വ്യക്തമാക്കുന്നത്.
പുതിയ കണക്കുകൾ പ്രകാരം പെട്രോളിനും ഡീസലിനും ലിറ്ററിന് 4 മുതൽ 5 രൂപ വരെയും, ഗാർഹിക പാചകവാതക സിലിണ്ടറുകൾക്ക് 40 മുതൽ 50 രൂപ വരെയും വർദ്ധനവ് ഉണ്ടായേക്കാം. ദീർഘകാലമായി റീട്ടെയിൽ വിപണിയിൽ വില മാറ്റമില്ലാതെ തുടരുന്നതിനാൽ എണ്ണ വിപണന കമ്പനികൾ വലിയ പ്രതിസന്ധിയിലാണ്. ഷിപ്പിംഗ് ഭീഷണികളും ക്രൂഡ് ഓയിൽ ലഭ്യതയിലുണ്ടായ കുറവുമാണ് ഇപ്പോഴത്തെ ഈ നീക്കത്തിന് പിന്നിൽ.
വില വർദ്ധനവ് ഉണ്ടാകുമെന്ന വാർത്തകൾ പ്രചരിച്ചതോടെ രാജ്യത്തിന്റെ വിവിധ ഭാഗങ്ങളിലെ പെട്രോൾ പമ്പുകളിൽ വലിയ തിരക്ക് അനുഭവപ്പെടുന്നുണ്ട്. പണപ്പെരുപ്പത്തിനും സാധാരണക്കാരന്റെ കുടുംബ ബജറ്റിനും ഈ തീരുമാനം വലിയ തിരിച്ചടിയാകുമെന്നതിനാൽ സർക്കാർ അതീവ ജാഗ്രതയോടെയാണ് വിഷയം കൈകാര്യം ചെയ്യുന്നത്. ഏകദേശം നാല് വർഷത്തിന് ശേഷമാണ് ഇത്തരമൊരു വില വർദ്ധനവിന് രാജ്യം സാക്ഷ്യം വഹിക്കാൻ പോകുന്നത്.
read more https://periya.in/pothan-code-suicide-lovers/